...en mig langar ekkert til þess að segja frá honum. Bíllinn sem mig langar til þess að segja frá er Toyotan mín og er ég búinn að skrifa heilmikinn texta fyrir þá sem hafa áhuga (eða ógeðslega lítið að gera).
Þeir sem meika ekki að lesa þessa langloku, þá eru spec listi og myndir í næsta pósti.
Jæja þá loksins sést þessi á götunni eftir 5 ár inni í skúr. Ætli maður þurfi þá ekki að segja frá gripnum. Ákvað að setja þetta hér þó svo að þetta sé ekki BMW, þar sem að l2c er lokað óskráðum notendum og svo þekki ég miklu fleiri hér. Um er að ræða Toyota Corolla GT 1985 árgerð, með 4A-GE mótor, sem hefur upplifað dagana tvo ýmist á götum borgarinnar sem og malarvegum sveitarinnar! Síðasta boddýið af Corollu sem var afturdrifin. Ég kaupi bílinn árið 2005 af Arnari sem rekur í dag Kvikk þjónustunna í Hfj. Hann hafði þá tekið bílinn í gegn að mestu leiti að utan, sprautað í fjólubláum metallic Honda mótorhjólalit og látið airbrusha naut á húddið og "controversial" myndir af svínum á afturhlerann. Ég keyri bílinn í nokkra mánuði og á því tímabili kaupi ég og set á bílinn afturljós af "zenki" bílnum með popup ljós ásamt króm skyggnum á hliðarrúðurnar.
Einn blautan vordag 2005 er ég svo á ferðinni á slitnum sóluðum dekkjum, kem að illmerktu vinnusvæði á miklubrautinni þar sem umferðin er stopp, bremsa, læsi, flít á bleytunni og enda aftan á Corollu sem var ca. 15 árum yngri en mín. Hún endar svo aftan á Land Cruiser. Semsagt Toyota samloka. Corollan sem varð á milli endaði á haugunum en mín endaði inni í skúr.
Hófst þá það ferli að gera bílinn upp frá núlli frá hvalbak að framenda. Þar sem að maður var ungur og vitlaus á þessum tíma með alltof mikið af peningum í höndunum var ákveðið að losa sig við gamla mótorinn og kaupa mótor frá Japan. Vélarrýmið var strípað og bíllinn sendur á réttingarverkstæði þar sem hann var réttur og soðinn. Keyptur var annar bíll í parta og framljósagrindin tekin af honum ásamt fleiru. Vélarrýmið var svo sprautað í sama Honda litnum. Svo þegar mótorinn kom þá var hann settur á vélarstand, strípaður niður í "bare longblock" og yfirfarinn.
Mótorinn:
Fyrir valinu varð 4A-GZE mótor úr '92-'95 AE101 Toyota Corolla Levin. Þessi mótor er byggður á sömu hönnun af blokk, svo hann smellur á mótorfestingarnar í bílnum og gírkassinn smellpassar, en það er allt og sumt. Þessi mótor er uppbyggður með "boost" í huga, í honum er lægri þjappa (8.9) og allt sverara og sterkara en í original '85 4A-GE. Utan á honum situr lítill 1200cc Toyota SC12 blásari og rafstýrt "wasted spark" kveikjukerfi. Ég panta mótorinn frá Fensport í Bretlandi með tölvu og rafkerfi og panta með honum 212 mm svinghjól, nýtt 212 mm kúplingssett, Forge Motorsport "front mount intercooler", Magnecor kertaþræði, signal breyti fyrir snúningshraðamæli og öflugri bensíndælu. Ný tímareim og vatnsdæla eru sett á mótorinn. AirCon pressan og vökvastýrisdælan eru tekin af og MR2 alternator bracket keypt þannig að hægt sé að smella alternatorinum á stökum án mikilla vandræða. Svo þurfti að modda vatns inn- og útganginn á mótornum, þar sem að hann kemur úr framdrifsbíl, ásamt að koma vatnslásnum fyrir og fóru ansi miklar pælingar í það. Útgangsrörið frá blásaranum var hannað fyrir "top mount intercooler" og var alltof þröngt, svo Siggi fékk það verkefni að smíða nýtt sem hentaði betur í bílinn hjá mér. Restinni svo púslað á mótorinn aftur og honum droppað ofan í vélarrýmið ásamt kassa með nýju 212 mm kúplingunni.
Næst á dagskrá var vatnskassi. Fyrsta hugmyndin var að nota vatnskassa úr Celicu sem ég fékk fyrir lítið en hann var bara svo gamall og ljótur að hann hefði skemmt fyrir lúkkið ofan í húddinu. Þá stóð til boða að panta Koyo kassa fyrir eitt stykki handlegg og ég tímdi því ekki. Sá þá þráð á Club4AG þar sem menn fullyrtu að Civic álkassi kældi nógu vel og mætti koma fyrir án mikilla vandræða, svo ég stökk á eBay og pantaði slíkan fyrir eitt stykki nögl af litla putta. Smíðaði festingar fyrir hann ásamt intercoolernum, kom fyrir á bílnum, kláraði að "plumba" vatn, gerði "mockup" af rörum fyrir loft og fékk svo Sigga til að sjóða.
Rafkerfið:
Þá var komið að bitanum sem fáir gátu hjálpað mér almennilega með og ég ákvað að tækla einn til þess að læra eitthvað af þessu öllu saman. Allt gamla rafkerfið frá mælaborði fram að framljósum, þ.m.t. öryggja- og relayboxi, var rifið úr og kerfið sem fylgdi mótornum sett í. Mótorinn kom aldrei í bíl sem fluttur var út fyrir Japan, svo það er ekki til "wiring diagram" á neinu öðru tungumáli en japönsku. Svo ég notaðist við evrópska AE86 "wiring diagram-ið" til að geta splæsað við original partana, ástralska AE101 "wiring diagram-ið" til að meika sens á öryggja- og relayboxinu ásamt fleiru og hæfilegan skammt af "common sense". Keypti gamalt loom úr AE101 bíl og bjó til front loom í bílinn úr því, ásamt original AE86 loominu. Svo bíllinn ætti að vera prittí mutsj klár fyrir hvaða AE101 mótor sem er. *Stoltur*
Fjöðrun o.fl.:
Í bílinn keypti ég svo Megan Racing coil-over kerfi, þar sem að það var að fá bestu dómana á C4AG af öllum "ódýru" coil-over kerfunum. Það kemur með "camber plates" og er hæðarstillanlegt allan hringinn án þess að tapa hreyfigetu á dempurum, 32ja vegu stífleikastillanlegt og svo camber stillanlegt. Bremsurnar tók ég í gegn, fékk Barka til að smíða vírofnar slöngur, fékk Sigga til að renna diskana og keypti nýja klossa. Stefnan er að panta nýja diska allan hringinn, rákaða að framan, ásamt PBR Axxis eða Porterfield R4-S klossa. Svo á ég eftir að kaupa læsingu, NCRCA eða stillanlega LCA og eitthvað fleira gotterí.
Svo þegar mótorinn datt í gang voru númerin sótt og bíllinn keyrður beint í púst hjá Andra í Kvikk þjónustunni. Þar hönnuðu Sævar SMG og Andri (ásamt smá inputti frá mér og Stebba GST) mega næs kerfi aftan á eBay flækjurnar mínar. Get alls ekki mælt með OBX flækjum, þurfti TALSVERT að modda þær til þess að þær fittuðu ofan í hjá mér, tala nú ekki um hversu illa rörin hitta á "flange-ana". Sævar reddaði því nú samt á no time. Þaðan var það svo bara beint í skoðun og að sjálfsögðu fékk ég grænan miða, en það eru bara smáatriði sem verða fixuð.
Þar sem að ég var brettalaus, þá gaf Óli Þór mér ónýt bretti af rally bíl sem ég henti á til að geta keyrt. Síðan fór ég í heimsókn til Stjána hjá Bílageiranum og náði hann að gera bara ótrúlega gott úr þessum ónýtu brettum. Við ákváðum svo að gluða mattri málningu yfir framhlutann á bílnum í svipuðum lit og Honda litinn (húddið og stuðarinn voru hvít). Planið er svo að fá góð bretti hjá Braga og plata einhvern plastsmiðinn til að taka mót af þeim og smíða nokkur sett. Any takers?
Sérstakar þakkir fær eftirfarandi fólk, án þeirra hefði ég ALDREI komið bílnum á götuna aftur:
Atli Steinar Stefánsson
Sigurður Maríasson / Wheelchair Performance
Kristján Þorgils Guðjónsson
Sævar Már Gunnarsson / SMGRacing
Andri Þór Halldórsson / Never Have A Nice Day Production
GSTuning "bræður" fyrir visku og bráðsmitandi dellu
Restin af Turbo Krúinu fyrir að reka á eftir mér
Bragi og Óli fyrir að vera sjúkir af sömu Toyotu ryðdollu dellunni
Strákarnir í vinnunni fyrir að hlæja að mér og gera grín að bílnum
...og síðast en ekki síst Inga frænka fyrir skúrinn og fjölskyldan fyrir þola þetta
Eftirfarandi fyrirtæki ber að nefna fyrir að vera með klassa þjónustu:
Varahlutaverslun Toyota Nýbýlavegi
Barki
Fossberg
Áliðjan
Polyhúðun
Þá held ég að þetta sé upptalið.
