http://www.visir.is/article/20090923/FR ... /907907285
Sænska lögreglan telur að þyrluflugmaðurinn sem tók þátt í að ræna peningageymslu öryggisfyrirtækis í morgun hafi hlotið herþjálfun. Þá leikur einnig grunur á að einn ræningjanna sé starfsmaður öryggisfyrirtækisins.
Ræningjarnir lentu þyrlunni á þaki öryggisfyrirtækisins og sprengdu sér leið inn í húsið. Næturverðir gerðu lögreglu viðvart og voru þjófarnir enn í byggingunni þegar hún kom á staðinn en þeir flugu á brott með ránsfenginn áður en lögreglan náði að komast upp á þakið.
Þyrlan fannst mannlaus norðan við Stokkhólm nokkru eftir ránið. Það virðist hafa verið þaulskipulagt en skemmdarverk voru unnin á þyrlum lögreglunnar sem fyrir vikið komust hvorki lönd né strönd. Sænska lögreglan telur að einn eða fleiri mannanna hafi hlotið herþjálfun þar sem þyrluflugmaðurinn hefur þurft að búa yfir talsverðri færni. Flugmaðurinn lenti þyrlunni mjög nálægt 12 metra háum birkitrjám. Þyrluspaðarnir voru aðeins nokkra metra frá þeim. Sænska lögreglan reynir nú að kortleggja hverjir búa yfir slíkri færni.
Þá leikur einnig grunur á að meðal þjófanna sé starfsmaður öryggisfyrirtækisins. Enn hefur ekki komið fram hversu stór ránsfengurinn var en lögreglan telur að hann hafi verið í kringum 1 milljarð sænskra króna eða 18 milljarðar íslenskra króna
