gunnar wrote:
Núna hef ég ekki nógu mikinn skilning á málunum en mig langar að átta mig betur á einu.
Erum við að tala um að þeir sem eigi hlutabréf í Landsbankanum og Glitni séu að tapa sínum verðmætum bara á einu bretti? Að hlutabréfin verði í raun og veru bara "strokuð" út og verðlaus ?
Endilega ef einhver getur útskýrt þetta fyrir mér þá væri það vel þegið.
Ég geri mér grein fyrir því að peningabréf t.d í Landsbankanum munu koma til með að falla mikið en hvað verður um hlutabréfin ?
Já, það lítur allt út fyrir það að hlutabréf í Glitni og Landsbankanum séu nú verðlaus. Þetta er auðvitað hrikalegt áfall fyrir fleiri þúsund manns sem eiga bréf í þessum fyrirtækjum, en svona er þetta, hluthafar fá gróðann þegar vel gengur en þurfa líka að taka á sig tapið. Það er einfaldlega áhætta að fjárfesta í hlutabréfum.
Ríkið tekur yfir bankana, eignast 100%, hluthafar tapa öllu. En við verðum líka að átta okkur á því að hluthafar myndu hvort sem er tapa öllu þótt ríkið tæki ekki yfir þá því ríkið er væntanlega að taka yfir þá því þessir bankar eru í raun komnir í þrot.
Annars eru þetta svakalegir tímar sem við erum að upplifa, fyrir stuttu síðan átti allt að vera í lagi en svo nánast á einni nóttu hrynur þetta allt saman. Nú er spilaborgin einfaldlega að hrynja.
Það hefur mikið verið talað um „lendingu“ hagkerfisins, að við fengjum mjúka lendingu. Þetta sem við erum að horfa upp á er einfaldlega algjör brotlending.
Þetta eru miklir óvissutímar, það er ekki hægt að segja annað. Fólk bíður í von og ótta um hvað verður um sparnað þeirra sem eru með peninginn í peningamarkaðssjóðum. Það er enn ekki búið að opna fyrir þá.
Og enn er lokað fyrir viðskipti með bréf fjármálafyrirtækjanna, maður sér eiginlega ekki alveg hvernig þeir ætla að opna aftur fyrir þau viðskipti í þessari óvissu.
Þegar það verður opnað aftur fyrir viðskipti með fjármálafyrirtækin í Kauphöllinni mun úrvalsvísitalan líklegast fara vel undir 2000 stig (er núna í rétt rúmlega 3000 stigum), við munum sjá líklegast mesta fall í sögu hlutabréfamarkaða á Íslandi.
Og þar sem krosseignatengslin eru svo mikil hér að þá verða áhrif þess að stór fyrirtæki eins og Glitnir og Landsbankinn lendi í þroti þeim mun meiri.
Tökum t.d. Exista sem dæmi. Þeir eru stærsti hluthafinn í Kaupþing banka (með tæplega 25% eignarhlut) og þegar það verður opnað aftur fyrir viðskipti með Kaupþing munu bréfin í Kaupþing hrynja (þeir þurftu á neyðarláni frá Seðlabanka Íslands að halda) og þar með mun verðmæti Exista hrynja með. Svo eiga Bakkavararbræður stærsta hlutinn í Exista og Exista á stærsta hlutinn í Bakkavör o.s.frv...
Það verður því all svakalegt fallið þegar loks verður opnað aftur í Kauphöllinni. Og maður veltir fyrir sér hvort hún verði hreinlega ekki lokuð allavega út þessa viku.
En þetta eru svakalegir tíma sem við erum að upplifa, það er ekki hægt að segja annað (þótt þeir séu ekki skemmtilegir). T.d. hefði manni ekki órað fyrir því að hér myndi ríkja gjaldeyrisskortur þannig að fólk á meira að segja í erfiðleikum með að fara til útlanda því það getur ekki keypt gjaldeyri og fyrirtæki fá ekki gjaldeyri. Það er eins og við séum komin 50 ár aftur í tímann þegar gjaldeyrisskömmtun var hluti af veruleikanum.
Login
Register
FAQ
Search
--
