Egill segist hafa komið á staðinn en þá var búið að fella ísbjörninn. Hann segir það rangt að ekki sé til deyfilyf í landinu, líkt og umhverfisráðherra, Þórunn Sveinbjarnardóttir, sagði í samtali við mbl.is. „Ég er meira að segja með deyfilyf í bílnum hjá mér og það er til deyfibyssa hjá dýralækninum á Egilsstöðum. Ef hún hefði verið send með flugi þá hefði byssan verið komin á staðinn eftir klukkustund," segir Egill í samtali við mbl.is.

Egill segir að ekki hafi verið vandasamt að útbúa gildru þar sem hægt hefði verið að lokka dýrið inn í. Þrátt fyrir að hann hafi ekki verið með byssuna með sér þá hefði verið hægt að setja deyfilyfið í æti enda ísbjörninn að öllum líkindum svangur.

Aðstæður kröfðust þess að dýrið yrði fellt.
Aðgerð sem þessi er afar flókin og krefst þess að til verksins sé notuð þyrla og sérþjálfað starfsfólk. Ef svæfing heppnast þarf að flytja dýrið í neti frá þeim stað þar sem það liggur og í sérhannað búr. Flutningstími má ekki vera langur vegna þess að áhrif svæfingar fjara út og að auki geta flutningar reynst dýrinu lífshættulegir. Hvorki tækni- né sérfræðiþekking á slíkri aðgerð er fyrir hendi hér á landi.